💬 Роземак започнува со серија објави во чест на младите талентирани литературни творци од ООУ „Живко Чинго“, Велгошти
Јазикот се негува и почитува со дела. 
Најголемата награда што може да ја добие еден наставник во својот работен век е да поттикне што повеќе ученици со интерес и посветеност да пишуваат на македонски јазик. 
Им благодарам на сите здруженија, училишта, институции и поединци кои организираат литературни конкурси и ни помагаат да им дадеме поддршка на младите талентирани творци.
Честитки, деца! Вие сте вистинските борци на браникот на татковината! Михаела Митреска , твори од срце и плети песни со милозвучни македонски стихови!
Глас на хуманоста
Во свет полн со тага и страв
каде често молчи правдата
се раѓа глас, нежен и здрав –
тоа е гласот на хуманоста.
Гласот тивко низ светот се шири,
не бара моќ, ни пари, ни име,
во секој поглед нежно трепери,
разгорува искра, светло и време.
Рака подадена без збор,
очи во солзи за туѓа болка,
љубов за сите без изговор
надеж откриена како бисер во школка.
Кога детска солза ќе капне,
а топла рака нежно ќе ја избрише
тој глас без зборови ќе те закрепне
со дела чисти, хуманост ќе испише.
Кога некој падне – да го кренеш!
Кога страда – со него да бидеш!
Со насмевка душа да му сретнеш,
со човечност најголема да блеснеш.
Низ страдања, низ премрежја тешки,
гласот на доброто пронаоѓа секогаш пат
го руши ѕидот што дели луѓе, без грешки
и гради мостови – чекор по чекор, брат до брат.
.png)
